Zaldiko Maldiko elkarteak Patxi Zubizarreta ekarriko du maiatzaren 9an. Egun horretako arratseko 20:00etan idazle gipuzkoarra Jeans-ak hozkailuan izeneko bere liburuaz solastatuko da bertaraturikoekin elkarteak antolatutako Liburuak irakurriz libertitzen gara zikloaren barruan.

Udaberriko zirkuituak bestelako ekitaldiak ere bilduko ditu bere baitan. Maiatzaren 16an, esaterako, Edorta Agirre idazle bizkaitarrak eta Asisko Urmeneta diseinugileak Elikadurari buruzko apustuak izeneko hitzaldia eskainiko dute ilunabarreko 20:00etan, bien artean idatzitako Baietz okerreko bidea aukeratu! liburuaren gainean hitz egiteko asmoz. Batak eta besteak elikaduraren alorreko ohitura txarrak azpimarratuko dituzte, kritika eta umorearen artean mugituz. Agirreren hitzak Urmenetaren marrazkiek ilustratuko dituzte.
Zirkuitua guztiz borobiltzeko, ekainaren 5eko iluntzeko 20:00etan Joseba Irazoki musikari beratarrak kontzertua emanen du. Bere errepertorio osotik hautaturiko kanta batzuk modu akustikoan eskainiko ditu Irazokik.